കേരളത്തിന്റെ നേട്ടം

ഇന്നത്തെ ഹിന്ദു പത്രത്തില്‍ വന്ന ഒരു റിപ്പോര്‍ട്ടാണ്‌. ലോക ബാങ്കിന്റെ ഒരു പഠനറിപ്പോര്‍ട്ട്‌ പ്രകാരം മികച്ച നിക്ഷേപക സൗഹാര്‍ദ്ദ അന്തരീക്ഷം നിലനില്‍ക്കുന്ന സംസ്ഥാനങ്ങളുടെ പട്ടികയില്‍ കേരളത്തിനു രണ്ടാം സ്ഥാനം. പതിനാറു സംസ്ഥാനങ്ങള്‍ ആണ്‌ പഠനത്തിനു വിധേയമായത്‌. ഇതില്‍ കര്‍ണ്ണാടകയുടെ തൊട്ടു പിന്നില്‍ ആണു കേരളത്തിന്റെ സ്ഥാനം.

ഈ റിപ്പോര്‍ട്ടിന്റെ സാധുത വിലയിരുത്താന്‍ അവര്‍ ഈ സംസ്ഥാനങ്ങളിലെ ആഭ്യന്തര വ്യവസായങ്ങളുടെയും ആഭ്യന്തര ഉല്‍പ്പാദനത്തിന്റെയും പ്രസ്തുത കാലയളവിലെ വര്‍ധനവാണ്‌ താരതമ്യപ്പെടുത്തിയത്‌. അഴിമതിയുടെയും അക്രമങ്ങളുടെയും അഭാവം (അല്ലെങ്കില്‍ കുറവ്‌), ഗതാഗത വാര്‍ത്താവിനിമയ സംവിധാനങ്ങളുടെ മികവുമാണ്‌ കേരളത്തിന്റെ ഈ നേട്ടത്തിനു പ്രധാനമായും തുണയായത്‌.

സ്ഥിതി വിവരകണക്കുകള്‍ ആണെങ്കിലും കേരളത്തിന്റെ ഈ നേട്ടത്തില്‍ പുഷ്കരന്‍ അതിയായി സന്തോഷിക്കുന്നു. ഈ വാര്‍ത്തയ്ക്കു പ്രചാരം ലഭിക്കട്ടെ എന്നു ആഗ്രഹിക്കുന്നു.

ഇന്നത്തെ (ജനുവരി 17) ഹിന്ദുവില്‍ ആണ്‌ ഈ വാര്‍ത്ത കണ്ടത്‌. www.thehindu.com എന്ന സൈറ്റില്‍ ഈ പഠന റിപ്പോര്‍ട്ട്‌ ലഭ്യവുമാണ്‌.

കണ്ടവരുണ്ടോ ?

രണ്ടു ദിവസം മുമ്പ്‌ മലയാള മനോരമയില്‍ വന്ന ഒരു നോട്ടീസ്‌ ആണു ഇത്‌. ആളെ പരിചയമില്ലെ ? കുറച്ചു മാസങ്ങള്‍ ഒന്നു പിന്നിലേക്ക്‌ റിവൈന്‍ഡ്‌ ചെയ്താല്‍ പിടികിട്ടും. മാദ്ധ്യമങ്ങളില്‍ നിറഞ്ഞു നിന്ന വ്യക്തിത്വം. ആളുകളെ പറ്റിച്ച്‌ (ഇതു പോലെയുള്ള തട്ടിപ്പുകള്‍ ഏണി വച്ചു അങ്ങോട്ട്‌ കയറി പിടിക്കാന്‍ മിടുക്കു നമുക്കു മാത്രമേയുള്ളു... ) സര്‍ക്കാരിനെയും പൊലീസിനേയും പറ്റിച്ച്‌ (?) ഇങ്ങനെ മുങ്ങിനടക്കാന്‍ ഇവര്‍ക്കു എങ്ങനെ കഴിയുന്നു എന്നാണു പുഷ്ക്കരനു സംശയം. പത്രങ്ങളില്‍ എന്തായിരുന്നു പുകില്‌? ചന്ദ്രമതിയെ ഇന്നു പിടിക്കും, നാളെ പിടിക്കും, ബാംഗ്ലൂരിലെ ഒരു ലോഡ്ജില്‍ നിന്ന് ഒരു തലനാരിഴയ്ക്കു പൊലീസിനു കൈവിട്ടുപോയി..... അവസാനം പവനായി ശവമായി. ഇതിനിടയില്‍ ആഭ്യന്തര മന്ത്രിയുടെ കഴിവു കൊണ്ടാണ്‌ ആയമ്മ രക്ഷപ്പെട്ടൂ നടക്കുന്നതെന്നും കേട്ടു... എന്തായാലും കാശു പോയവനു പോയി... പത്രത്തിലെ ഫോട്ടോ ഒക്കെ കണ്ട്‌ ചന്ദ്രമതിയമ്മ ചിരിക്കുന്നുണ്ടാകും, എല്ലാവരെയും പുഷ്ക്കരന്മാരാക്കുന്ന ഒരു ചിരി. എതു കേസിലും ഇതൊക്കെ തന്നെ ഉണ്ടാകുകയുള്ളൂ എന്നു പുഷ്ക്കരനു തോന്നുന്നു. അമേരിക്കയിലെ ഒരു വിദ്വാനും ഇമ്മാതിരി തട്ടിപ്പു നടത്തിയിട്ടും ജയിലില്‍ പോലും പോകാതെ വീട്ടില്‍ ഇരിക്കുന്നു. ആക്രികടക്കാരന്റെയാണെങ്കിലും നീതിദേവതയുടെ ആണെങ്കിലും തുലാസ്സ്‌ തുലാസ്സ്‌ തന്നെ. ലോഹത്തിനു ഭാരം കൂടുകയും ആ തട്ട്‌ താഴേക്കു പോകുകയും ചെയ്യും. അഭയകേസിലും ഇതൊക്കെ തന്നെയല്ലെ സംഭവിക്കൂ... ? പുഷ്ക്കരന്‍ നീതിദേവതയെപോലെ കണ്ണൂ മൂടികെട്ടാന്‍ തീരുമാനിച്ചു.

വെളിച്ചം ദുഖമാണുണ്ണി,

തമസ്സല്ലോ സുഖപ്രദം.